AMIGO/A INVISIBLE

Chegan as festas e, dado o éxito acadado o ano pasado, as nenas e nenos de 4º volveron a intercambiar agasallos do/a amigo/a invisible. Todos eles elaborados con materiais de refugallo que reutilizaron para crear estas obras de arte.

Unha vez máis fixeron cousas moi bonitas e orixinais. Aquí as deixamos:

FELICES FESTAS!!!

CONDUTA PAS (Protexer, Avisar e Socorrer)

As alumnas e alumnos de 4° de Primaria participaron nun obradoiro impartido por persoal da Cruz Vermella na nosa Biblioteca. Aprenderon nocións básicas de primeiros auxilios, que lles permitirá coñecer mellor as situacións máis habituais de emerxencia e como actuar con orde e serenidade ante as mesmas.

Moitísimas grazas!!!

                       Sumádevos a practicar os primeiros auxilios como estes nenos e nenas!!!

AS FAMILIAS PARTICIPAN

Que mellor maneira de rematar o proxecto do corpo humano que manipulando e xogando cunha réplica do noso corpo. Ademais, a través deste xogo puidemos ver en 3D os órganos traballados en semanas anteriores.

Todo isto grazas á colaboración de José e a súa familia, que nos facilitaron esta magnífica actividade, permitíndonos aprender xogando.

COMO SOMOS POR DENTRO?

Os nenos e nenas de 4º decidiron investigar sobre os distintos órganos que forman o noso corpo. Para conseguilo empregaron diferentes xogos e actividades, agora ben todos tiveron a mesma finalidade: Investigar e profundar nos órganos máis importantes do corpo humano.

Por aquí vos deixamos os resultados:

Porque como di Diane Ackerman: "Xogar é a forma favorita do noso cerebro para aprender". 

E vós queredes xogar? 

CHEGOU O OUTONO

O outono chegou ao cole de Barro e, para celebralo, o alumnado de 4º de primaria elaborou nas clases de educación artística uns bonitos mouchos e unha decoración magosteira dacordo coa celebración da que gozamos hai uns días.

 

Aquí tedes os resultados:

  

O REFRANEIRO POPULAR

A cultura tradicional é moi sabia e o alumnado de 4º descubriuno estas semanas, coa axuda das súas familias, recollendo os refráns máis populares da nosa tradición.

Como podedes ver témolos de todos os gustos... algúns son moi suxerentes.

Animádevos a lelos!

SOMOS O QUE COMEMOS

Démoslle a benvida ó novo curso con moitas ganas de seguir aprendendo e coñecendo.

E que mellor maneira de comezar que traballando sobre os hábitos diarios para medrar sans e fortes?

Para iso, despois da busca de información, creamos os nosos pratos saudables, onde recollemos aqueles alimentos necesarios para conseguilo.

Todos chegamos á mesma conclusión: Coma os alimentos cultivados na casa, ningún! Vós tamén pensades o mesmo?

O mundo que desexamos

Comezamos novo curso e, que mellor maneira de facelo que, unírmonos ás actividades da organización Fridays for Future contra o cambio climático e a pasividade dos gobernos de todo o mundo ante esta problemática tan real e actual.

En 4º curso de Primaria, os alumnos e as alumnas realizamos diferentes actividades para conciencíarmonos da necesidade de modificar actitudes diarias, co fin de frear esta situación.

Entre elas, destacamos a visualización de vídeos, pancartas de protesta, busca de información sobre as conclusións da cumbre da ONU e a modificación de condutas no cole.

Aquí vos deixamos os resultados!

Benvidos e benvidas a este novo curso!

MARTIÑO E O CAMIÑO

E igual que o curso vai chegando ao seu fin... o proxecto Martiño e o Camiño tamén remata despois dunhas cantas horas de investigación e diversión, somerxéndonos entre diferentes textos, experimentando coa robótica e descubrindo a Realidade Aumentada.

Pouco a pouco fomos superando cada unha das misións e agora queremos compartir convosco todo o traballo que realizamos, por iso se pulsades sobre a seguinte imaxe accederedes a un documento con todas as nosas tarefas.

MARTIÑO E O CAMIÑO. Unha bandeira para Martiño

Durante o proxecto `Martiño e o Camiño´, ocorréusenos que, para a súa peregrinación a Santiago, Martiño debería levar con el unha bandeira que o identificase. Así que, puxémonos mans a obra e deseñamos unhas bandeiras ven chulas que podedes ver neste documento:

https://issuu.com/colexiodebarro/docs/bandeiras

Ademais, coa axuda dunha app de Realidade Aumentada chamada Quiver, conseguimos que esas bandeiras tomasen vida e ondeasen coma se fosen de verdade. Animádevos a facer vós a proba usando o pdf que aparece máis arriba!

MARTIÑO E O CAMIÑO. Misión 4

Superadas todas as misións, Martiño preguntounos se seriamos quen de transformar esas rutas tan antigas do Camiño de Santiago, que investigamos na misión 2, en rutas transitables para robots:

 https://sites.google.com/view/o-camio-de-santiago/misión-4 

Así que puxémonos mans a obra. En primeiro lugar, deseñamos as rutas en papel seguindo os códigos de Ozobot, ou mellor dito de `MartiñoBot´, pois finalmente personalizamos o noso robot coa imaxe de Martiño. Unha vez deseñadas en papel, tocou coller os robots e comprobar que estes funcionaban perfectamente sobre cada ruta e se lle podían propor a Martiño.

Comprobadas as rutas robotizadas, debuxámolas no mapa da Península Ibérica para pasar a última proba de deseño, que por certo foi todo un éxito.

Todos os retos conseguidos, e misión superada con éxito!!

Parabéns grumetes!!

Xeometría con fita adhesiva

Estes días, os rapaces e rapazas de 4º estamos traballando algúns conceptos xeométricos. Nesta ocasión, tocou traballar a medida de ángulos e, para iso, usamos un pouco de fita adhesiva de cores, uns rotuladores, as nosas mesas e o transportador de ángulos.

Colocar a fita foi moi divertido, xa que non sempre se pode usar a nosa mesa como caderno pero máis divertido foi ter que medir os ángulos en grupo. Ao principio, custounos un pouco pero finalmente, como o traballo en equipo se leva mellor, todos o fomos conseguindo.

Posteriormente, para reforzar a medida dos ángulos, partimos do nome de Martiño, o noso compañeiro infatigable de aventuras durante este último trimestre, que nos animou a seguir buscando ángulos. 

MARTIÑO E O CAMIÑO. Misión 3

A misión 3 estaba directamente relacionada coa seguridade viaria en bicicleta xa que a Martiño se lle ocorreu facer unha das rutas do Camiño de Santiago neste medio de transporte. Para iso unha vez máis tivemos que facer uso do site de investigación onde aprendemos moito sobre elementos de seguridade, normas e sinais de circulación para finalmente crear un tríptico informativo.

Unha vez rematados os trípticos, tocou o momento de xogar co Bee Bot para resolver os retos cos que Martiño se atopou na vía. Foi moi divertido buscar o sinal que daba resposta ao reto proposto.

A creatividade nas ciencias

Nestes últimos meses os cativos e cativas de 3º estiveron realizando distintos traballos sobre temáticas relacionados coas ciencias.

Traballaron temas como as enerxías renovables e non renovables, as liñas do tempo e as consecuencias da catástrofe do Prestige entre outras.

De todas elas saíron traballos moi interesantes e aquí vos deixamos os resultados.

A Pirata Mimi ensina as Illas Cíes

O alumnado de 3º e 4º de Educación Primaria foi de excursión de fin de curso ás Illas Cíes. Esta visita permitulle contemplar cos seus propios ollos contidos traballados durante todo o curso, como a gran variedade de vexetación das illas, a diversidade de especies mariñas ou as graves consecuencias que tivo a catástrofe do Prestige para o Parque Nacional Marítimo Terrestre das Illas Atlánticas. 

Foi unha experiencia moi enriquecedora xa que as nenas e os nenos puideron comprobar en primeira persoa todos os datos recollidos nos meses anteriores. E, sobre todo, descubrir o lugar no que habita a Pirata Mimi, a encargada durante o curso de enviar tarefas e dar información ao alumnado de 3º e 4º.

Tamén houbo tempo para o desfrute e a ledicia de celebrar a recta final deste curso 2018 - 2019 en sintonía e boísima compañía.

Unha auténtica gozada!!!

A ilusión apodérase de nós

Despois de moitas actividades e tarefas, o alumnado de 3º conseguiu rematar o quebracabezas do proxecto anual. Isto permitiulles descubrir a recompensa final...

Unha excursión ás ILLAS CÍES!

Para saber se lles fixo ilusión, só hai que ver as súas caras.

O luns arrancamos a aventura.

A PIRATA MIMI

Durante o verán pasado Mimi descubriu que é familia do último pirata do Atlántico, sabedes quen é? Efectivamente, é o pirata pontevedrés Benito Soto. 

Este descubrimento fíxolle moita ilusión e quixo compartilo connosco propóndonos un conxunto de retos propios dos máis hábiles grumetes, posto que para resolvelos precisamos usar habilidades de linguaxe, coñecementos matemáticos e científicos, destrezas de debuxo, traballar en grupo, realizar investigacións....

Cada certo tempo Mimi enviábanos unha carta na que nos dicía que reto debíamos afrontar e despois de superalo nos mandaba unha peza dun quebracabezas que representaba o mapa dun tesouro que tiña agochado o pirata Benito Soto. 

Reto a reto, a veces con algunha que outra dificultade, fomos construíndo o mapa do tesouro que finalmente nos levou a coñecer o Parque Nacional das Illas Cíes.

Ben feito grumetes!!